قصيدة ( كام قصيدة ) شعر أحمد رحال
كام قصيدة كتبتهالك
بالمحبة قلتهالك
كانوا كام ؟؟
كانوا واحدة ولا أكتر ؟
مش ها تفرق !
كنت حاسس لما باكتب فيكى شعر
إنى باكتب عمرى فيكى
إنى بارسم روحى فيكى
كنت شايف فى القصيدة لون عنيكى
كنت بأفرح لما ألاقى روح جديدة
فى القصيدة
وأفرح أكتر
لما أحس المعنى بيكى
القصايد هيا هيا
بس روح الشعر فيها
مش لاقيها ؟
ولا أقولك انتى أصلاً فى القصيدة
مش لاقيكى !
عارفه ليه ؟
لما تبقى واحدة تانية
مش حاسسها
ومش لامسها
يبقى ها اكتب شعر فيكى ؟؟؟
طب يفيد الشعر أيه ؟
============
كنت دايما بـ القى معنى للقصيدة
وانتى جمبى مش بعيدة
طب هألاقى المعنى فيكى
طب منين ؟؟
وانتى أصلا مش معايا
بس برضو بابقى شايفك فى المعانى
كأنى شايفك فى المرايا
بس برضو واحدة تانية
ما انتى خدتى
كل حاجة إلا حاجة ....
هى روح الشعر فيا
فاعذرينى لو كتبتك فى القصيدة
مش حبيبتى .... مهما سيبتى
واعذرينى لو لقيتى ف ال جاية
واحدة تانية ومش حبيبتى
بقلمى أحمد رحال
ليست هناك تعليقات:
إرسال تعليق