ومش قادر .... بقلمى
فى وسط همومى متحاصر
ما بين وجعى وبين وجعك
ما بين تعبى وبين تعبك
لا أنا قادر أشيل عنك
ولا قادر أكون مرتاح
وأعيش يومى
حزين قلقان
وكلى جراح
أروح عندك
ومش فارقة تكونى حاسة بوجودى
ما دام حاسس أنا بيكى
وأناديكى
وأقولك والدموع نازلة
عاملة ايه ؟
تردى بس بعنيكى وتبتسمى فأطمن
وما أطمنش !!
وأقوم واخد ايديكى الثلج ف ايديا
وأخبى دمعة ف عنيا
فتنزل رغم حبستها
وتنزل ايدك الغضة على خدى
أدوب من سحر لمستها
أقرب لك كمان أكتر
فيكتر حزنى جوايا
واقولك ليه ما بترديش
وأبوسك بوسة ف جبينك
أقول فينك ... فمتجاوبيش
وساعة تمر بين صمتك وبين حزنى
أقوم واخدك أنا ف حضنى
وأحط ودانى فوق صدرك
فتطلع اه تدبحنى
يارب اشفيها ريحنى
ماليش غيرها
==================
بقلمى أحمد رحال
12 / 3 / 2013
